Ariketak
BANAKAKO ARIKETA EGITARAUA, ERRETINOSI PIGMENTARIOKO GAIXOEN IKUSMENA ETA BIZI-KALITATEA HOBETZEKO
Sarrera
Arnas-botatze teknika
Sentimenak
Irribarre egitea
Ahurrak estalgarri
Begirada egokitzen


"Beti egin duzuna besterik egiten ez baduzu,
beti joan zarena baino urrunago ez zara iritsiko
"
-anonimoa-


Gure osasunaz hitz egiten dugunean, eta batez ere gure begien osasunaz eta gure bizi-kalitateaz, merezi du hausnartzea zein jarrera den kaltegarri eta zein mesedegarri; hau da, zein jarrerak ikusarazten digun bizitza "malko leku" moduan, eta zeinek, ostera, aurkezten digun benetan bizitzea eta gozatzea merezi duen esperientzia gisa, egunez egun osasunerantz nola hobeto abiatu erakutsiz.

Gure bizitzako ohiturek, askotan, zoritxarreko sentitzera eta gaixotasunera garamatzatela ikusten badugu, aukera eman diezaiogun geure buruari ohitura berriak hartzeko, eta hauen bitartez zoriontasuna eta osasuna bilatzeko.

Eta egin dezagun hori bat ere beldurrik gabe, alaitasunez: zalantzarik ez izan, portaera bat (orain artekoa) ikasi baldin badugu, portaera berri bat ere geure egiteko gai izango garela.

Apur bat pentsatuz gero, ohartuko gara gutxitan onartzen dugula beste inor arduratzea geure bizitzako gauza garrantzitsuez (ez eta gairik xeheenak badira ere): geuk erabakitzen dugu nola jantzi, uda non pasatu, etxea nola apaindu, soldata zertan gastatu, seme-alabak nola hezi,... Eta hala ere, gure bizitzako oinarri-oinarrizko alde bat guztiz besteren eskuetan uzten dugu: GURE OSASUNA.

Egia esan, ezin diogu jokabide horren errua geure buruari egotzi, ez baitugute askorik irakatsi osasuna zaintzeaz: Nola hartuko dugu gure esku ezagutzen ez dugun zerbaiten ardura?

Auto bat erosten dugunean, diru ugari ordaindu behar izan dugunez gero, mekanika apur bat ikasi eta hura nola hobeto zaindu ikasten saiatzen gara, zein erregai komeni zaion jakiten, adibidez. Baina geure gorputza dohainik jaso dugunez, ez gara ohartzen hura behar bezala ez zaintzea gero ordaindu egiten dugula, oinazea jasoz eta bizi-kalitatea galduz.

Adituen laguntza eta aholkua beharrezkoak ditugu gure osasuna zaintzeko, baina ez dugu horren ardura osoa sendagilearen esku utzi behar: burua erabil dezagun, ikas dezagun eta arduratu gaitezen geure gorputzaren osasunaz.

Gure eskuetan dagoena ez da soilik prebentzioa, zenbait gaixotasun saihestea; horretaz gain, gaixotasunak agertu eta gero ere, asko egin dezakegu geure osasunaren alde eguneroko ahalegin xumeen bidez.
1996an Euskadiko Erretinosi Pigmentarioko Gaixoen Elkarteak RPko gaixoentzako soin-ariketa egitarau ondo betea sortu zuen eta haien eskura jarri liburuxka batean bai eta audio-zintan.

1996an Euskadiko Erretinosi Pigmentarioko Gaixoen Elkarteak RPko gaixoentzako soin-ariketa egitarau ondo betea sortu zuen eta haien eskura jarri liburuxka batean bai eta audio-zintan.

Material horretako zati batzuk hemen sartzea erabaki dugu, on handia egin baitie ariketa egitaraua horretan murgildu diren gaixo ugariri.



Arnas-botatze teknika

Ikasi behar dugun lehen ariketa estresaren kontrola dugu, eta behar bezala arnas hartzeak ikaragarri lagunduko digu ahalegin horretan. Ariketa honetan ez dezagun arnasa sakon hartu, ez dezagun arreta arnasa hartzean jarri, baizik eta arnasa botatzean: nahikoa da arnas-hartze laburtxo bat, eta segidan bai kontzentra gaitezen arnasa geldiro-geldiro kanporatzeko.

Arnasa ahalik eta geldoen kanporatuta ere ez dugu arnas barik gelditzeko arriskurik, gure birikek, berez, behar dugun airea hartuko baitute, guk horretaz arduratu behar izan gabe. Egin dezagun ariketa hau beti erropa erosoz jantzita, inon ere estutzen ez gaituena.

Behar bezainbeste aldiz errepikatuko dugu ariketa hau erlaxaturik egon arte.



Sentipenak

Hainbat ikerketak erakusten dute zenbait sentipenek, sentipen ezkorrek, ahuldu egiten gaituztela, eta sentipen baikorrek, berriz, sendotu.

Ahultzen gaituzten sentipen batzuk herra, bekaitza, mesfidantza, beldurra, errua dira, besteak beste.

Sendotu egiten gaituzte, ostera, maitasunak, fedeak, konfiantzak, esker onak...

Bestalde, sentipen ezkorrak izkutatzen ahalegintzen bagara geure baitan pilatu baino ez ditugu egingo, eta bere horretan jarraituko du haien eragin kaltegarriak.

Hortaz, ezinbestekoa dugu sentipen berriak, baikorrak, ezartzea geure baitan, ahultzen gaituzten sentipen ezkorrak ordezkatzeko.



Irribarrea

Hain arrunta eta erraza den keinu honek hainbat gihar mugiarazten eta hormona abiarazten ditu, eta ondorioz eragin terapeutiko ikaragarri handia dauka. Ez dugu hemen sakonduko hain konplexua den irribarrearen prozesu fisiologikoan, baina hausnarketa txiki bat bai egingo dugu: gustura gaudenean irribarrea berez sortzen zaigun bezalaxe, irribarrearen keinua bera behin eta berriro egiteak hobeto sentiarazten gaitu. Horregatik dugu hain onuragarri ezpainetan irribarrea eramatea beti, eta batez ere irribarrerako arrazoi eta gogorik gutxien daukagunean.

Egin ezazu proba: berehala nabarituko duzu keinutxo honen eragin ona (bai zeugan eta bai ingurukoengan).



Ahurrak estalgarri

"Gure gorputza lorategia dugu, eta gure borondatea lorezaina"
-William Shakespeare"-


Onura handia ekar diezaguke zenbait ariketa egiteko ohitura geureganatzeak.

Egunero dutxa hartu edo hortzak garbitzen ditugun bezala, eguneroko ohitura bihurtu behar genuke erraz-errazak baina guztiz eraginkorrak diren zenbait ariketatxo egitea.

Eta ariketa onuragarri guztietatik, batek merezi du bereziki gure denbora eta arreta, berehalako atsedena ekartzen baitie etengabe ahalik eta zorrotzen ikusteko ahaleginean ditugun gure begiei:

      

Eserita gaudela, ukalondoak mahai baten gainean jarrita, begiak estali eskuez, ahurrak piska bat biribildurik eta begiak estutu gabe. Hatzamarrak bekokian, esku batekoak bestekoen gainean. Minutu batez eutsi, begi aurrean kartoi beltz bat irudikatuz geure baitan.
Astia baldin baduzu, musika lasaia entzun ariketa egin bitartean, eta gustuko duzun ikuspegi bat irudikatu, sakon eta lasai arnas hartzen duzun bitartean, harik eta zeure begiek eurek ere arnas egiten dutela somatzen duzun arte, arnas botatze bakoitzaren bitartez nekea eta tentsioa kanporatuz.



Begirada egokitzen

      

  • Hatzamar erakuslea gorantz luzatu begi aurrean, sudurretik arra betera.
  • Hatzamarra mugitu gabe, arnas hartu eta ahal den urrunen begiratu (1).
    Arnasa barruan eutsi bi segunduz.
    Begiak kliskatu.
  • Aranasa kanporatu, begirada hatzamar puntan jarririk (2).
  • Betaurrekorik edo ukipen-lenterik gabe egin behar da ariketa.
  • Eta gogoan izan, osasuna hobetzeko zerbait egiten hasten baldin bazara, ez utzi, eta bai eutsi: berandu gabe jasoko duzu saria.

Séneca-k omen zioen: "Bi zama dauzka bizitzak: disziplina eta damua. Disziplinaren pisua gramotan neurtzen da, damuarena, berriz, tonatan".


 

 

© 2004 EPEGE - eskubide guztiak erreserbatuta